காலமாற்றம்

1981இல் வெள்ளவத்தை என்று நிறைய நண்பர்கள் பழைய புகைப்படங்கள் சிலவற்றைப் பகிர்ந்திருந்தார்கள். கூர்ந்து பார்க்கும் போது அப்பத்தைய பெண்கள் எல்லாரும் நல்ல வடிவான உடுப்புப் போட்டு, நல்ல ட்றேசிங் சென்ஸ்சோட இருந்திருக்கிறதா தெரியுது. அத நினைச்சாத்தான் கவலையா இருக்கு. வெள்ளவத்தை, அப்போதும் இப்போதும் தமிழர் நகரம் தான்.

இலங்கையின் அறுபதாமாண்டு காலப் படமொன்றை முன்னர் ஒரு தடவை பார்த்து வியந்தேன். சாதாரணமாக சந்தையில் பண்டம் வாங்கும் பெண்களின் படங்கள் அவை. படங்களில் பாடல்க்காட்சியின் பின்னணியில் வரும் 'ரிச் கேர்ள்ஸ்' மாதிரி இருந்தார்கள்.

எனது அம்மா பழையவர். அறுபத்தைந்து பிராயம். சிறிய சட்டைகளையும், காற்சராய்களையும் மட்டுமே இளம்பருவத்தில் யாழ்ப்பாணத்தில் அணிந்ததாகச் சொன்னார். கோப்பாய் கிறிஸ்தவக் கல்லூரயில் முழங்காலுக்கு கீழே சட்டை போட்டால் தண்டனை என்றும் சொன்னார். கணருபனின் அம்மா அதே காலத்தவர். அறுபது பிராயம். தான் என்னென்ன வகையான கால்ச்சப்பாத்துக்களை அணிந்ததாகவும் இப்போது அப்படி ஒன்றுமேயில்லை என்று கேலியாக, "நான் ஸ்டைல் என்று சொல்லி அணிந்திருந்த" எனது செருப்புக்களை பார்த்துவிட்டுச் சொன்னார். யாழ்ப்பாணம் போகும் போது தலைவிதியே என்று சொல்லிக் கொண்டு முடிந்தளவு என்னைவிடப் பெரிய உடுப்புக்களையே கொண்டு செல்வேன்.

இந்த வியர்வைக்கு கையில்லாத சட்டையும், கால்ச்சராயும் தான் சரி....நீர் அதைக் கொண்டு வந்திருக்கலாம், இதுகளை காவினதுக்கு என்றா, மாமி. லப் டொப்பில், ரண்டமாக படங்களை அவவுக்கு காட்டிக்கொண்டிருக்கும் போது 'சின்ன' சட்டை போட்ட படம் வந்ததும், சமாளித்து 'நெக்ஸ்ட்' குடுப்பதற்காக பம்மினேன். உடனே அவா இந்தச் சட்டை வடிவாயிருக்கு, ரஷ்யாவிலிருந்து வரேக்க இப்பிடித்தான் , இதிலும் வலு கட்டையான சட்டைகள் நான் கொண்டுவந்தது என்று காசுவலாச் சொன்னா. எனக்கு ஒரே அசிங்கமாப் போய்ட்டுது. எங்கள் பிராயத்தவருக்கு எதைச் செய்தாலும் சூதானமா செய் என்று சொல்லும் அலேர்ட் எவ்வளவு அழுத்தமாக மூளைக்குள் பதிந்திருக்கிறது!

ரெண்டு நாள்க்கழிச்சு, கணரூபன்ர அம்மாண்ட நண்பி ஒருத்தர் வந்தா. அவ ஒரு டீச்சர். ஐம்பது பிராயமிருக்கும். அவவுக்கு என்கேஜ்மெண்ட் படங்கள் காட்டிக்கொண்டிருந்தம்.

வேற மாதிரி நீர் பிளவுஸ் போட்டிருக்கலாம். அவர் தாடி வழிச்சிருக்கலாம்....

என்னெண்டு?

கை நீட்டா வெச்சு, கொஞ்சம் பட்டு சாரி மாதிரி....

நாங்கள் மூவரும் ஒருவரை ஒருவர் பார்த்துக்கொண்டோம். ஒன்றும் பேசவில்லை.

நிறைய நேரம் கதைத்துவிட்டு டீச்சர் போய்ட்டா. போக முதல் கணரூபன்ர அம்மா, டீச்சரைப் பாத்து சொன்னா, 

"நீர் செலிபிரிட்டி கிரிக்கெட் லீக் பாக்கிறேல்லையா? இப்பை எல்லாம் ஷோல்டர்லஸ் தான் ஸ்டைல்"

இப்பிடி எத்தினை பேரை சமாளிக்க வேண்டி இருக்கு 😅😅

எனது அப்பா சல்வார் போட்ட பெண்களை சினிமாவில் மட்டும் தான் பார்த்ததாகச் சொன்னார். ஆரும் ஜெயலலிதா போட்டுக்கொண்டு வாறதை சல்வார் என்று சொன்னா, நான் காதை அறுத்து கண்டநல்லூர் ஜமீனுக்கு காணிக்கை குடுப்பேன். அறுபது பிராயத்தில் உள்ளவர்களுக்கு ஆடைக்கலாசாரம் பெரிதாகத் தெரியவில்லை. ஆனால் நாப்பதுகளில், ஐம்பதுகளில் இருப்பவர்கள் உயிர் போவதைப் போல இதைப் பற்றி வெகுண்டெழுகிறார்கள். என்ன காரணம்?

தொண்ணுகளுக்கு பின்னர் யாழ்ப்பாணத்தில் சல்வார் கலாசாரம் வந்தது. அதற்கு முன்பெல்லாம் கட்டைச் சட்டையும், பாவாடை,பிளவுசும் இருந்தது. அதனோடே சைக்கிளும் ஓட்டினார்கள். சல்வார் எப்போது கலாசார உடுப்பாக மாறியது? ஒரு கலந்துரையாடலில் கதைத்துக்கொண்டிருந்த போது, யாழ்ப்பாணத்தில் சில டியூட்டரிகளில் கால் பிரிக்கப்பட்ட அதாவது காலை பிரித்துக் காட்டக் கூடிய உடுப்பு எது போட்டாலும் வீட்டுக்கு அனுப்புவார்களாம். அவ்வாறே சல்வார் போட்ட பிள்ளைகளையும் வீட்டுக்கு அனுப்பினார்களாம். நீண்ட, குதிக்கால் மறைக்கும் பாவாடையே அணிந்திருக்க வேண்டுமாம். அதாவது கால் பிரிந்த உடை அணிந்தால், வீட்டை விட்டு தொலைவு போகும் துணிச்சல் வருமாம்.

இப்போது சிங்களவர்களையும் கெடுக்கப் பாக்கிறார்கள் இந்தப் பொல்லாத் தமிழர்கள். அதுகளும் சல்வார் வாங்குதுகள். 'ரொப்பும்' ஜீன்சும் போடுதுகள். சிங்களப் பிள்ளைகள் தான் காண்பதற்கினியதாக இருந்தீச்சுதுகள். ஹ்ம்ம்...

இந்தமுறை, புது வருசத்துக்கு ஃபூட் சிட்டியிலையும், அதுகளுக்கான கலாசார உடையையே மாத்தீட்டானுகள். வழமையா வயிறு தெரியிற பிளவுசும், 

கம்பாயமும் கட்டுற பிள்ளைகளை, நீட்டு பிளவுஸ் போட வெச்சது எது?

நீங்க எப்பிடியாவது நாசமா போங்க! அதுகள் காலா காலமா போடுற கலாசார உடை அது,அதையுமா மாத்துவிங்க?