எஞ்சாமி நீயி எப்ப வருவ?...

ஒண்ணுமே சொல்லாம போன எஞ்சாமி !

குத்தமொன்னு சொல்ல- குமுறியழ நீங்க இல்ல-

ஒன்னுக்கு ஒண்ணா உசிரா வளத்துப்புட்டேன்- 

உக்காந்து தேத்திவிட -நீங்க இல்ல எஞ்சாமி !

இவ கிடக்கா சிறுக்கியின்னு இம்புட்டும் இரங்காம-

விறைப்பா நீரு, வில்லங்கமாப் போனீரு,

கண்ணுக்குள்ள நீரு வரப்பத் தாண்டுது- 

ஆத்தில தண்ணி அடிச்சிகிட்டு ஓடுது-

எருக்கம் வித கையிருக்கு- அரளி வித அரைச்சிருக்கு- 

எஞ்சாமி நீயி எப்ப வருவ?...........

ஒத்தையில நட்டு வெச்ச மரம் போல வாடி நிக்கேன்-

வாடிய பயிருக்கு வாழ கொஞ்சம் பச்சை கொடு.

கத்தியில கட்டி வெச்ச  காய் போல காஞ்சிருக்கு-

காயெல்லாம் தேஞ்சு என் வாய் போல பொளந்திருக்கு-

வேணாஞ்சாமி நான் உன்னைக் குறை சொல்ல

எல்லாத் தப்பும் எம்மெல்ல எஞ்சாமீ-

குடை பிடிச்சு இங்காரும்  நெய் விளக்கு  ஏத்துவாரோ?

கோடியில யாரும் கொடி வெச்சு தூத்துவாரோ ?

ஐப்பசியில் மழை பேஞ்சு ஆவணியில் காத்தடிச்சா

சித்திரையில், செங்கரும்பு சீனிபோல தித்திக்கும்முன்னு,

ஒத்தையில போன எறும்புகளைப் புடிச்சி வெச்சி-

ஒத்தடம் கொடுத்து- உருக்கமாப் பாத்துக்கிட்டது - எந்தப்பு எஞ்சாமீ !

எதுகை மோனை தெரிஞ்சா கை புடிச்சேன்-

எதுக்கும் நீரு தெரிஞ்சா கண் சிரிச்சீர்! 

நாளுக்கு அந்தம் நாளாக நாளாக,

இந்த ஏழைக்கு அந்தம்  பாழாக பாழாக,

யாருக்கு யாருன்னு எழுதி வெச்சா படைச்சாக,

நீருக்குள் இலையொன்ன அமுக்கி வச்சா ஒழிச்சாக?

ஒன்னும் குத்தமில்ல, ஒ மனசில் நானுமில்ல.

நீங்க ஆளப் பொறந்தவுங்க ஆண்டுகிட்டே அங்கிருங்க.

மாளப் பொறந்தவுங்க மாண்டுகிட்டே  இங்கிருக்கோம்.

ஒண்ணுமே இல்லையின்னு ஒருவாட்டி சொல்லியிருந்தா-

இன்னுமே ஆகாம இங்கிருந்து அழுவேனோ?

எத்தன நாள் பாத்திருக்கோம்-

எதுவெல்லாம் பேசிருக்கோம்-

தனிமையில சிரிச்சிருக்கோம்-

தாங்காம மொறைச்சிருக்கோம்-

காத்தில கை விரிச்சு காணாதத தேடும் படி-

ஆத்திதில மீன்புடிக்கும் இந்த அருவாச் சிறுக்கிக்கு ,

ஏட்டில கை புடிச்சும் எழுத்தே வரல்லேன்னு, 

ஏக்கப் பட்டவளை - நூத்தில ஒண்ணாக்கி நூழிழையில் தூங்கும் படி

எஞ்சாமி என்னதுன்னு போட்டே சொக்குப் பொடி?  

கவித படிச்ச நீ கஞ்சிக் கலயத்தக் கவிழ்த்தாலும்

கஞ்சிப் பருக்கையில கவித தெரியுது கா.

பொத்திப் பிடிச்சபடி மனசே தெரியாம போக்குக் காட்டிக்கிட்டு நடக்கையில-

பொத்துன்னு விழுகுதுன்னு - பொறவெடுத்து பாக்கையில-

வேகாத என்னெஞ்சின் வேர் பிஞ்ச இதயம் சாமீ! 

ஒன்னப் போல ரெண்டுமில்லே !

உன்னப் போல யாருமில்லே !

என்னப் போல பத்து விம்பம் என் எதிர்க்கே தெரியுது கா.

ஒன்னொன்னும் கேலிசெய்து உச்சத்தில் கத்துது கா.

ஆழம் பாத்தா காலவுட்டேன்-  

காலம் பாத்தா சொல்லிப்புட்டேன்

கடல் பெருசுன்னு கலந்துக்க நான் நினைச்சேன்- 

குருட்டுக் கண்ணுக்கு அது குளமென்னு புலப்படல்லே!

ஆசைப் பட்டபடி உங்கூரு பிள்ளையாரை-

ஒன்பது நாள் சுத்தி வந்தேன்- 

தொந்திப் பிள்ளையாரே தோக்கப் பண்ணிணீ ரே !

அந்திமக் காலத்திலேயும் மறப்பேனா ஐயா சொல்லும்? 

ஒண்ணுமில்ல எஞ்சாமி,

உசிரு போகையில ஒத்தையில நின்னு- ஒன்கண்ணைப் பாத்த படி

பத்தி எரிகிற பாடையில என் தேகம் -

பச்சை இலை போல - மசமசன்னு புகையடிக்கும்.

அது நான் காத்திருந்த கண்ணீருன்னு,

ஒன  காதில யாரும் சொல்லுவாக.

கேட்டபடி நீ போவ -

உனக்காயிரம் ஜோலியிருக்கும். 

(மட்டக்களப்பு /அம்பாறை  நாட்டாரியல் வழக்கில் எழுதப்பட்டது)

நிலா -

06 .09 .2010